من زيارة السيسي لتدريبات المنتخب المصري. الصورة: المتحدث باسم الرئاسة- فيسبوك
نص كلمة السيسي خلال زيارة المنتخب المصري قبيل كأس أمم أفريقيا 15/6/2019
كل المُتُشة هاتتلعب، ويتبقى المنظر. الانطباع الطيب اللي إحنا هانقدمه عن نفسنا لكل شاب في سنكوا.
السيسي: صباح الخير جميعًا، كل سنة وإنتوا طيبين، وأتمنى لكم كل التوفيق.
بس أنا عايز أقولكوا على حاجة، أهم من اللعب، إزاي نقدم نفسنا للناس، أهم من اللعب عندي، وعند كل المصريين، نقدم نفسنا لمصر وللناس في العالم اللي هاتتفرج علينا إزاي. بنتمنى إن إحنا نشوف أحسن نتيجة، وطبعًا أنا في تقديري، أنا كإنسان، القيم والمبادئ بتاعة اللاعب المحترم والنضيف، ونكران الذات، ده أهم حاجة عندي.
الماتش، كل المُتُشة هاتتلعب، ويتبقى المنظر، الانطباع الطيب اللي إحنا هانقدمه عن نفسنا لكل شاب في سنكوا، لكل شاب في سنكوا، لأن إنتوا بالنسبة للشباب مَثَل وقدوة، المثل والقدوة ده بيحاسب على نفسه كويس قوي.. قوي! في كل تصرف، بقول وإحنا في الملعب كدة، كل اللي بيتفرج عليك. ده من ضمن اللي أنا بتمناه إن إحنا يعني كمصريين، وأنا واحد منهم، نشوف الشاب المصري زيه زي أفضل شاب في العالم، في كل شيء، أفضل في كل شيء.
فـ.. كل سنة وإنتوا طيبين، وأتمنى يا رب يوفقكوا، ونشوفكوا في أحسن حال، ونستمتع بأداءكم اللي دايمًا إنتوا بتمتعونا بيه، وربنا يوفقكوا إن شاء الله..
(يسأل اللاعبين) حد عايز حاجة منكم؟
هاني أبو ريدة: بعد إذنك يا فندم، (يحمل تيشيرت المنتخب) يعني، باسم اللعيبة بنهدي حضرتك، منتخب مصر كلهم موقعين على فانلة منتخب مصر، بنهديها لحضرتك.
السيسي: والله متشكر جدًا، متشكر جدًا.
أبو ريدة: وعايزين نقول لحضرتك إنه، أولًا بنشكر كل أجهزة الدولة. مجموعة العمل ليل مع نهار، ده اللي هايساهم إنه أبناءنا المرحلة الجاية هايستفيدوا من البنية التحتية اللي موجودة في كل ربوع مصر، البنية التحتية الرياضية النهاردة ماشاء الله بخير.
فبنشكر حضرتك على الاهتمام، والشكل اللي هايطلع لإفريقيا بشكل كبير جدًا، ملاعبنا بمستوى عالي جدًا، بنشكر حضرتك.
السيسي: ربنا يوفقكوا.
أشرف صبحي: كلهم يا فندم عندهم استعداد للكفاح، وروح معنوية عالية جدًا، البطولة وما بعد البطولة..
أبو ريدة: إن شاء الله نبقى قد المسؤولية.
ألقيت الكلمة باستاد الدفاع الجوي، بحضور د.أشرف صبحي وزير الشباب والرياضة، والمهندس هاني أبو ريدة رئيس مجلس إدارة اتحاد الكرة، ولاعبي المنتخب الوطني، وذلك قبيل بطولة كأس الأمم الأفريقية التي ستبدأ في القاهرة في الحادي والعشرين من يونيو الحالي.
