صورة أرشيفية للرئيس عبد الفتاح السيسي. المتحدث باسم الرئاسة- فيسبوك

نص تعليق السيسي على كلمة وزير التعليم العالي خلال افتتاح جامعة الملك سلمان 31/10/2020


اسمح لي يا دكتور خالد أتكلم بس. الدكتور خالد اتكلم في الموضوع دوت علشان القاهرة وغربها، وعشان أقربلكوا المسألة بشكل بسيط لكل الناس اللي بتسمعنا، إحنا قلنا إن إحنا بغض النظر إحنا بنتكلم على جامعة خاصة أو جامعة أهلية أو جامعة حكومية، في دولة زي مصر، كل مليون عايزين جامعة على الأقل، مش كدة يا دكتور خالد؟ كويس.

فإذا كنا إحنا 100 مليون دلوقتي، فإحنا محتاجين يكون عندنا 100 جامعة في مصر، بغض النظر هو تبويبهم، تصنيفهم إيه، مش كدة يا دكتور خالد؟ كويس.

الوضع الحالي إحنا عندنا 72، عندنا 72 جامعة باختلاف أنواعها. لو إحنا وصلنا لـ 2032 زي ما قال الدكتور قال، بيقول إحنا هانوصل لـ125 مليون، 125 مليون يعني إيه؟ يعني في 25 مليون زيادة، المفروض يبقى عندنا 125 جامعة.

هو اتكلم الدكتور خالد على شرق القاهرة وغرب القاهرة، لكن أنا عايز أديـ.. يعني، إذا كنت أنا بعلق، بعلق عشان أدي صورة للواقع الي إحنا رايحين له خلال، يعني 12 سنة، إنتوا الجامعة الواحدة بتتكلف تقريبا، تقريبا في حدود من 8 لـ 10 مليار؟ مش كدة؟ من 8 لـ 10 مليار جنيه، يبقى إنت لما بتتكلم على فجوة فيها تقريبا 30-40 جامعة، يعني إنت بتتكلم في 400 مليار جنيه، 400 مليار جنيه للإنشاء، مش بتتكلم في 400 مليار جنيه للإنشاء والتشغيل.

أنا بس دي نقطة مهمة جدا جدا عايز أذكرها لكوا هنا، إحنا شغالين، ومصرين على إن إحنا الفجوة اللي موجودة في أضيق فرصة، وأنا كنت أتمنى إن الدكتور خالد ينوه عن ده إن خلال الـ7 سنين أو الـ6 سنين اللي إحنا موجودين فيهم دول إحنا عملنا قد إيه واتحركنا قد إيه عشان نقلل الفجوة اللي موجودة، مش بالحجم فقط، إحنا اتكلمنا على جودة التعليم، وقلنا إن إحنا مصرين إن إحنا نقدم تعليم، يعني، يعني يناسب آمالنا وأحلامنا لمصر، وقلنا إن إحنا عندنا حتى دلوقتي، مش كدة؟ دلوقتي 30 ألف طالب مصري بيتعلموا في الخارج. ده عبء على أهاليهم وعلى أسرهم. مش عبء مالي، لأ، عبء اللي هو الظروف الحالية اللي موجودة في كورونا وغيره وغيره، بيتمنى لو في جامعة في مصر كويسة تستوعب، مش هاقول كل العدد ده، ولكن جزء من العدد ده.

اللي إحنا بنعمله دلوقتي، واللي إحنا عملناه دلوقتي، إن إحنا بفضل الله سبحانه وتعالى، الجامعات اللي بنعملها زي الدكتور خالد ما قال كدة، قال إن إحنا مش بنعمل خرسانات ومنشآت، لأ إحنا بنعمل جامعة بمواصفات ومعايير عالمية، عشان تحقق الهدف، وتخلي التعليم المقدم للدارس أو الدارسة، الطالب أو الطالبة، تعليم متقدم يناسب حجم العمل القادم، يعني مانعلمش حد تعليم في النهاية لما ييجي يتخرج مايلاقيش فرص عمل متحققة ليه.

معلش أنا آسف إن أنا دخلت كدة، لكن عايز أقولهم إن إحنا باختصار شديد، كل مليون بني آدم، أو كل مليون إنسان في مصر، هايبقى محتاج جامعة، فلما نبقى 100 مليون، يبقى 100 جامعة، الجامعات دي تصنيفاتهم إيه؟ جامعات حكومية وجامعات أهلية وجامعات خاصة، وكل ما شئتم إن إنتوا تسموه. بقينا 125 مليون، يبقى عايزين 25 مليون كمان، طبقا للمعايير ال، ال، الموضوعة أو المعتبرة في تقديم جودة تعليم كويس لعدد سكان بالحجم بتاعنا... شكرا دكتور خالد.


ألقيت الكلمة في شرم الشيخ، بحضور الأمير فهد بن سلطان بن عبد العزيز أمير منطقة تبوك، والدكتور خالد عبد الغفار وزير التعليم العالي، وعدد من الوزراء.


خدمة الخطابات الكاملة للسيسي تجدونها في هذا الرابط.