صورة أرشيفية للرئيس عبد الفتاح السيسي. المتحدث باسم الرئاسة- فيسبوك

نص تعليق السيسي على كلمة رئيس الهيئة الهندسية خلال افتتاح جامعة الملك سلمان 31/10/2020


هاستأذنك يا إيهاب دقيقة واحدة لو سمحت.. في المشروع ده تحديدا، اللي بيتكلم عليه سيادة اللوا إيهاب رئيس الهيئة الهندسية، إحنا قلنا إيه؟ قلنا زي ما هو كدة ذكر في بداية كلامه إن كان في حجم من الميه، هذا الحجم من الميه وإحنا اتكلمنا فيه قبل كدة، يعني في عدة لقاءات، لكن أنا بفكركوا وبفكر نفسي بيه، كانت حجم من الميه بيلقى في البحر، هي ميه صرف زراعي، وجزء منها صرف صحي يعني، وكانت بتلقى في بحيرة المنزلة ومنها إلى البحر المتوسط.

طب إيه الاستفادة من كمية الميه ديت بدل ما نرميها في البحر المتوسط، طب ما ناخدها نعملها أعمال صناعية زي ما قال كدة اللوا إيهاب، ونعدي بيها من غرب القنال لشرق القنال، ثم تتعمل محطة بحر البقر اللي هو ذكرها دلوقتي.

طيب.. هو اتكلم على تكلفة المحطة اللي تقترب من 18 مليار جنيه، لكن، عشان نعمل المشروع ده اللي إحنا بنتكلم على مسار، هذا المسار جزء منه مكشوف، وجزء منه مش مكشوف، يعني جزء منه ترع تشوفوها، وجزء ماشي، مش كدة يا إيهاب؟ وجزء تاني وجزء مواسير. ثم إعداد البنية الأساسية، سواء كانت البنية الأساسية ديت طرق أو كهربا، أو المية أو المنشآت اللي هاتتعمل لصالح الناس اللي هاتعيش على النص مليون فدان دول.

أنا بتكلم على سينا تحديدا، خلال الـ6 سنين اللي فاتوا دول، إحنا تجاوزنا الـ600-700 مليار جنيه.

الرقم المحتمل للموضوع ده بيتحسب دلوقتي، لكن عايز أقول إن عالأقل الكهربا والمية، الكهربا وخط المية اللي موجود، إحنا بنتكلم في أكتر من 20-25 مليار جنيه، إذا كنت أنا فاكر يعني.

ثم بقى تسوية الأرض وتجهيزها و.. شوفوا... أي موضوع نقوله هانعمله، هي كلمة بتتقال، لكن جنب منها إجراءات كتير جدا جدا بتتعمل عشان الموضوع اللي نقول عليه يتعمل ويتنفذ، يتعمل ويتنفذ يبقى ليه مطالب، قبل ما نطلق المشروع، هل المطالب دي هانستطيع إن إحنا نلبيها؟ أيوة، يبقى نعمله، ونعلن عنه.

إحنا بنتكلم على محطة المعالجة، وهي تقريبا شارفت على الانتهاء. إحنا دلوقتي في آخر شهر، في أول نوفمبر مش كدة؟ طيب يبقى عندنا شهرين و6 شهور، 8 شهور ونفتتح أكبر محطة معالجة للمية في.. في العالم زي ما قال اللوا إيهاب.

محاولة الاستفادة من الميه، محاولة خلق مجتمعات عمرانية جديدة في مناطق فاضية زي ما إنتوا شايفين كدة في سينا. لو تشوفوا حجم التكلفة المالية اللي اتصرفت خلال، أنا بتكلم على سينا تحديدا، خلال الـ6 سنين اللي فاتوا دول، إحنا تجاوزنا الـ600-700 مليار جنيه.

إحنا اتكلمنا عل الجامعات، واتكلمنا على محطات الميه، واتكلمنا على الطرق. لكن كل مطالب التنمية في سينا بيتم الإنفاق عليها، حتى، حتى تتحقق الأهداف اللي إحنا ذكرناها، إن هنا يبقى في حياة لسينا بدل ماهي منطقة أو أرض مش موجود فيها الكلام ده، وده بيكلفنا كتير لأن إحنا بندخل على أراضي خام، أراضي لم يتم الدخول فيها وإقامة بنية أساسية للطرق. على سبيل المثال هو بيتكلم على طريق النفق طابا اللي هانفتتحه النهاردة، لكن إحنا فاتحين من عدة شهور الطريق النفق شرم الشيخ. نفق شرم الشيخ.

وبالمناسبة با إيهاب إحنا افتتحنا الطريق، ولكن استخدامات الطريق لم تُستكمل، وأنا لما بسأل بقول ليه قالوا هيئة، يعني وزارة النقل مش عارف استلمت أو ماستلمتش.. لأ.. يبقى، يعني خلال أسبوع آخد تمام إن الطريق شغال والناس بتعدي عليه... اتفضل يا إيهاب، شكرا.


ألقيت الكلمة في شرم الشيخ، بحضور الأمير فهد بن سلطان بن عبد العزيز أمير منطقة تبوك، اللواء إيهاب الفار رئيس الهيئة الهندسية، وعدد من الوزراء.


خدمة الخطابات الكاملة للسيسي تجدونها في هذا الرابط.