السيسي أثناء تفقده أعمال تطوير شبكة طرق الساحل الشمالي. الصورة من صفحة المتحدث باسم الرئاسة - فيسبوك

نص ملاحظات السيسي أثناء تفقده مشروعات تطوير شبكة طرق الساحل الشمالي 16/7/2021


بس أنا عايز أوضحلك نقطة هنا، كل الجهد اللي بيتعمل في المنطقة دي بالكامل هو زي ما إنت قلت كدة، هو إن إحنا بنعمل، بناخد مية الصرف، كان قبل كدة بيتجمع وبيترمي في منطقة المكس، ثم بنحولها من خلال محطات رفع والمصرف الرئيسي اللي إحنا بنتكلم عليه من دمنهور مارًا ببحيرة مريوط ووصولًا إلى منطقة الحمام هنا أو إلى محطة المعالجة في منطقة الحمام اللي إحنا بنتكلم عليها ديت، عشان، علشان نعالجها معالجة ثلاثية متطورة، إحنا بنتكلم على مية صرف زراعي كانت قبل كدة بيتم، بيتم يعني، استخدامها، ثم بعد كدة بيتم إلقاءها في المكس.

إحنا جمَّعنا المية اللي موجودة ديت بالكامل، وعملنا لها مسار بمحطات رفع لأن إحنا بنتحرك عكس الانحدار الطبيعي للأرض، ثم في محطة المعالجة اللي إحنا بنقول إنها كانت 6.8 وبنشوف كل المية اللي ممكن نجيبها 6.8 مليون متر في اليوم، إلى 8 مليون متر في اليوم، ثم محطة المعالجة، ثم بعد ما يتم معالجتها يتم بردو محطات رفع تاني تحريكها في اتجاه الأراضي اللي إحنا بنتكلم عليها في منطقة وادي النطرون بالكامل عشان يتم زراعة المليون او الاتنين مليون فدان اللي إحنا بنستهدف عمايلهم.

اللي أنا عايز أقوله هنا في شبكة الطرق اللي بتتعمل، إحنا ماستنيناش، إحنا بنشتغل في المنطقة دي بالكامل بالتوازي، بنعمل مشروع الري، وبنعمل الطرق الرئيسية اللازمة، وكمان فيه التخطيط المنطقة بالكامل، مدن وقرى، في هذه المنطقة وفي الدلتا الجديدة اللي بنتكلم عليها.


أنا بس كل اللي عايز أقوله للناس اللي بتسمعنا، إحنا عملنا 24 كيلو زي ما إنت قلت كدة في أقل من شهر، تقريبا 4 حارات. ليه بنعمل كل ده دلوقتي هنا في منطقة وادي النطرون بالكامل؟ في الدلتا الجديدة، إحنا بنعمل حاجتنا، الشكل الموسع اللي ممكن حد يقول: يعني إنتو حجم الطرق اللي إنتو بتعملوه، والمصارف اللي بتعملوها، يعني، قد يكون تكلفتها كتير. إحنا بنعملها لأن إحنا تكلفتها دلوقتي والأرض فاضية مافيش فيها حاجة أقل بكتير من إن إحنا لو سيبنا الأمور وعملنا زراعة وعملنا ده وبعدين في الآخر نيجي نعمل شبكة الطرق.

فإحنا بنشتغل بالتوازي، بنشتغل في مناطق فاضية بسهولة وبيسر، وبتكلفة أتصور إنها أقل كتير من إن إحنا نستنى بقى لما العمار ييجي والمرافق تتحط، ونيجي نضطر إن إحنا نعمل تنسيقات أخرى ونشيل مرافق ونعمل.

أنا بشكركو على الجهد الكبير ده في الوصفة بتاعة المطار، لكن إحنا متفقين على إن إحنا الـ 55 كيلو اللي إنتو قلتوا عليهم بتوع مدينة العلمين دول، هاتخلصوهم في قد إيه؟ آه، كتير 4 شهور، شدوا حليكوا، انا عارف إن 4 شهور مدة قصيرة جدًا بالمناسبة، لكن عايز أقول إن إحنا قدرتنا كدولة مصرية قادرة على إنها بشركاتها بإمكانياتها إنها تعمل مش هاقول المستحيل، لكن تعمل معدلات عمل عالمية، فيه حد يعمل طريق في شهر؟ ويعمل كوبري في 18 يوم؟ مافيش.. الكوبري كان بياخد 3 سنين قبل كدة... ربنا يوفقكو، متشكرين وكل سنة وإنتو طيبين.


إحنا هانخلص إمتى يا أحمد؟ إحنا كدة خدنا كام يوم؟ 25 يوم يعني، يعني قبل العيد. طب كل سنة وإنتو طيبين، أنا بشكركو، وبشكر الناس اللي شغالة، دي حاجة عظيمة إن إحنا نخلص كوبري في أقل من شهر، متشكر جدًا، متشكرين، شكرًا جزيلًا.


ألقى السيسي بهذه الملاحظات أثناء استماعه إلى شرح المهندسين لما تم إنجازه أثناء تفقده مشروعات تطوير شبكة طرق الساحل الشمالي.


خدمة الخطابات الكاملة للسيسي تجدونها في هذا الرابط