السيسي يحيي بعض المواطنين. الصورة من صفحة المتحدث باسم الرئاسة - فيسبوك

نص حوار السيسي مع مواطنين خلال تفقده مشروعات الطرق في القاهرة 3/12/2021


السيسي: (لابنة المواطن) إزيك يا جميلة؟

مواطن 1: بنور سيادتك سيادة الريس، ربنا مايحرمناش منك، وربنا يخليك لينا.

السيسي: ويخيلك.

مواطن 1: وربنا يحميك يا رب.

السيسي: نفسك في إيه؟

مواطن 1: أنا؟ نفسي أطمن على معاليك.

السيسي: لا ولا حاجة اطمن عليا.

مواطن 1: والله نفسي أطمن على معاليك.

السيسي: أنا بخير طول ما إنتم بخير.

مواطن 1: لو قلتك على حاجة هاتصدقني؟

السيسي: طبعا.

مواطن 1: أقسم بعزة وجلال الله، وحياة مابقول يا رب استرها عليا، وإنت معاليك وزير دفاع وإنت بتخطب الخطبة أنا كنت بقعد أبكي بالدموع. أقسم بعزة وجلال الله.

السيسي: طمني عليك.

مواطن 1: أنا الحمد لله بحمد ربنا، الحمد لله.. الحمد لله.

السيسي: شغال إيه؟

مواطن 1: أنا؟ ديليفري. ديليفري في صيدلية.

السيسي: عندك كام عيل؟

مواطن 1: معايا تمارا ومعايا عُدَيّ، ومعايا محمود.

السيسي: 3 أولاد.

مواطن 1: آه.

السيسي: ساكن هنا؟

مواطن 1: ساكن هنا في شقة في الخصوص.

السيسي: بتدفع كام إيجار؟

مواطن 1: بدفع 600 جنيه.

السيسي: العيال في المدارس طبعا، مش كدة؟

مواطن 1: المدارس. دول في حضانة ومحمود في مدرسة.

السيسي: طب إنت عايزني أعملك إيه؟

مواطن 1: أنا؟ ماقدرش أقولك، أنا عايز أشوفك أحسن الناس، أحسن حد في العالم.

السيسي: وأنا عايز أشوفك أحسن واحد.

مواطن 1: وربنا يحميك لينا ويخليك لينا يا رب.

السيسي: ويحميك.

مواطن 1: وربنا يقدرك على اللي إنت بتعمله.

السيسي: يا عُدَيّ...

مواطن 1: كلم سيادة الريس يا عدي.

السيسي: (يضحك الرئيس) خلي بالك من بابا.

مواطن 1: ربنا مايحرمناش منك، وربنا يخليك لينا.

السيسي: وأنا تحت أمرك.

مواطن 1: أنا أمنية حياتي، ما أدفعش إيجار. نفسي في شقة، وورشة أفتحها لابني من المحلات اللي هي بتبقى تحت الكوبري دي، وأدفع إيجار زيي زي أي حد.

السيسي: إن شاء الله هانعملك كل حاجة حلوة.

مواطن 1: ربنا مايحرمنيش من معاليك.

السيسي: خلي بالك من ولادك، وخلي بالك من نفسك.

مواطن 1: الحمد لله، الحمد لله.

السيسي: ربنا يخليك.

مواطن 1: ربنا يحميك ويخليك.

السيسي: متشكرين.

مواطن 1: وربنا يقدرك على اللي إنت بتعمله في البلد.

السيسي: متشكرين، متشكرين.

مواطن 1: ربنا يعينك.. ربنا يعنيك علينا يا رب.. وربنا يسترك دايما.

السيسي: يارب وهو السميع. متشكرين.

مواطن 1: ربنا يحميك.. ربنا يحميك يا رب.. ربنا يحميك يا ريس.


السيسي: سلامو عليكو يا حاجة.

مواطنة 2: سلام ورحمة الله.

السيسي: إزاي صحتك؟

مواطنة 2: الله يكفيك شر المرض.

السيسي: اللهم آمين.

مواطنة 2: يا رب ينجيك ويكفيك شر الطريق يا رب.

السيسي: إنتو طمنوني عليكو.

مواطنة 2: ربنا يخليك لينا..

السيسي: ويخليكو..

مواطنة 2: والله العظيم خليت البلد مية مية.

السيسي: ده فضل الله وفضلكو.

مواطنة 2: الله يباركلك.

السيسي: إزاي صحتك؟

مواطنة 2: ربنا يخليك لينا سعادة الريس.

السيسي: مش عايزة حاجة؟

مواطنة 2: يارب يباركلك، عايزاك أحسن من أي حد.

السيسي: والله صحيح؟

مواطنة 2: الله ينجيك، الله يكفيك شر الطريق.

السيسي: والله صحيح؟

مواطنة 2: الحمد لله.

السيسي: شوفتي بقى الستات المصريين جدعان إزاي

مواطنة 2: إنت أحسن من أي حد.

السيسي: لا...

مواطنة 2: ربنا يخليك لينا..

السيسي: لا والله..

مواطنة 2: يارب يخليك.

مواطنة 3: يا سيادة الريس، عايز يسلم عليك (تقصد طفلها)

السيسي: (يضحك الرئيس) في المدرسة يا يوسف ولا لسة؟

مواطنة 2: (لطفلها) قوله في حضانة.

السيسي: في الحضانة.. راجل جدع..

مواطنة 2: قوله هاطلع زيك.

يوسف: هاطلع زيك.

السيسي: ده إنت هاتبقى أحسن مني كمان.

مواطنة 2: قوله ربنا يخليك لينا.

مواطنة 4: إزيك يا سيادة الريس؟

السيسي: أهلا وسهلا.

مواطنة 4: اتشرفنا بحضرتك.

السيسي: كتر خيرك..

مواطنة 4: ربنا يبارك فيك يا رب..

السيسي: كتر خيرك.

مواطنة 4: يا رب يبارك فيك.

السيسي: عايزين حاجة؟

مواطنة 4: آه...

السيسي: تحت أمرك.

مواطنة 4: ابني... عايزة أشغل ابني...

السيسي: حاضر...

مواطنة 4: يا رب يكفيك شر المرض..

السيسي: حاضر

مواطنة 4: ويعمر بيك دنيا وآخرة يا رب، يا رب يعمر بيك يا سيادة الريس.

السيسي: حاضر.. حاضر.


أجرى الرئيس هذه الحوارات مع مواطنين "تصادف وجودهم" أثناء مروره لتفقده سير الأعمال الجارية بعدد من مشروعات شبكة الطرق الجديدة بالقاهرة.


خدمة الخطابات الكاملة للسيسي تجدونها في هذا الرابط