الرئيس عبد الفتاح السيسي من احتفالية قادرون باختلاف. الصورة: المتحدث باسم الرئاسة- فيسبوك

نص مداخلات السيسي في احتفالية "قادرون باختلاف" 5/12/2021



المذيعة: النهارده هايشارك معايا في تقديم الاحتفالية عدد من البطلات والأبطال اللي هايكونوا مذيعين لأول مرة، وهانبتدي بأول بطلة معانا النهارده، رحمة ممدوح. صباح الفل يا رحمة.

رحمة: صباح الفل، حمدلله على سلامتك. أنا رحمة ممدوح، عندي 19، لاعبة ألعاب قوى في نادي مدينة نصر، وطالبة في أكاديمية الفنون، المعهد العالي للفنون المسرحية (تصفيق)

إزيك يا ريس؟

السيسي: إزيك يا رحمة، أهلا وسهلا، أهلا وسهلا.

رحمة: وحشتني، بحبك قوي.

السيسي: وأنا كمان والله بحبكوا جدا، صحيح. (تصفيق) متشكر جدا يا رحمة، متشكر.

رحمة: أنا فرحانة إن حضرتك معانا، دايما معانا على طول.

السيسي: إن شاء الله دايما كلنا مع بعض على طول، كلنا، مش أنا بس، كل المصريين (تصفيق) كل الناس في مصر. إنتي عارفة يا رحمة إن كل الناس في مصر بتحبكوا قوي، وسعيدة بيكوا جدا؟ وزي ما قالت ال... يعني في بداية التقديم، إن، إن الدعم الإيجابي من الناس، كل الناس، لكم، أمر مش هايتوقف، وهايزيد. وإحنا بنتحرك، صحيح مش بخطوات قوية قوي.. لسه، لسه ماوصلناش للتقدير الحقيقي للكنز اللي ربنا باعتهولنا، اللي هو إنتوا.. فأهلا وسهلا بيكي، أهلا وسهلا. (تصفيق)


(شاب اسمه عبد الرحمن يلقي شعرا)

السيسي: إحنا ممكن يا عبد الرحمن نعمل المداخلة دلوقتي (يضحك الرئيس) (تصفيق) إحنا ممكن ـنعمل كدا، معلش أنا هاستأذن حضرتك يعني.. ممكن نبدأ دلوقتي، عايز تقول إيه؟

عبد الرحمن: أنا عايز أقول لحضرتك إن أنا ليا حلم، اتحقق السنة اللي فاتت برؤية حضرتك، والنهارده بمداخلة حضرتك.

السيسي: (يضحك الرئيس) (تصفيق)

عبد الرحمن: وكمان بردو، إن أنا حلمت بالبرنامج علشان أناقش قضية إخواتي أصحاب الهمم "قادرون باختلاف" وعشان حضرتك تكون أول واحد مننا (تصفيق)

السيسي: يا عبد الرحمن، أنا شايف إن إحنا كسبنا إعلامي رائع، وده فرصة إن إحنا نقدمه النهارده لكل مصر وللدنيا كلها.

والدة عبد الرحمن: يا رب يخليك يا ريس. (تصفيق) (زغرودة من الأم)

السيسي: اتفضل يا عبد الرحمن، عايزين نشتغل بقى.. (يضحك الرئيس) اتفضل.

عبد الرحمن: أنا عايز بس حيوا والدتي بس بعد ما..

السيسي: لا ده إحنا لسه ماحينهاش، هانحييها عالمسرح دلوقتي.

عبد الرحمن: ربنا يخلي حضرتك يا رب.

السيسي: أومال إيه. طبعا على الشعر الجميل وعلى الشخصية الجميلة اللي هي، يعني، اللي إحنا شايفينها قدامنا، ربنا يخليهالك ويخليك لها، ودايما تشوفها بخير وسلام.

عبد الرحمن: شكرا. (تصفيق)


ألقيت الكلمة في القاهرة، بمركز المنارة للمؤتمرات، بحضور عدد من أصحاب الهمم وذوي القدرات الخاصة.


خدمة الخطابات الكاملة للسيسي تجدونها في هذا الرابط