من لقاء غرب سهيل. الصورة: المتحدث باسم الرئاسة- فيسبوك

نص حديث السيسي في اللقاء المفتوح مع أهالي قرية غرب سهيل بأسوان 27/12/2021


سلامو عليكو.. كل سنة وإنتوا طيبين.. سعيد إن أنا موجود معاكوا.. يا رب تكونوا بخير دايما.. أهل النوبة ناس طيبين قوي، قوي قوي.. آه والله.. كتر خيرك، متشكر متشكر.. وأنا والله الحب والاحترام والتقدير وكل حاجة. إن شاء الله. وربنا يجعل كدا دخولنا عندكم دخول طيب يعني. (الأهالي يرحبون بالرئيس) سلامو عليكو.. سلامو عليكو..

...

03:33

مواطن1: نرحب بك قائدا لمسيرة التنمية. نرحب بك رجلا أنقذت هذا البلد إلى معترك يعلم الله وحده إلى ما كنا سنسير إليه، وكنا نتطلع ومتشوقين جدا إلى مطلب واحد (جملة غير واضحة) المطالب كلها تحققت مع حياة كريمة. دعواتنا لك يا سيادة الرئيس، وأشكركم على تشريفكم لهذا البلد، والسلام عليكم ورحمة الله.

السيسي: أنا اللي بشكرك على الكلام الجميل، وعلى الرقة، وعلى الفصاحة اللي تحدثت بيها.. وأنا والله.. لا والله، لا والله، ما شاء الله، ربنا يديك الصحة.. الكلام جميل، وكلام من قلب أبيض صحيح، صحيح يعني. وربنا يا رب يعينا إن إحنا نعمل كل حاجة طيبة لكل الناس، هنا في وفي كل مصر. بدعواتكوا الطيبة، بدعواتكوا الطيبة هانقدر نعمل ده.

وأنا عايز أقولك على حاجة، أنا عهدي مع أهل أسوان كلهم، من زمان قوي، يعني من 40، 50 سنة، عرفت الناس من الجيش، من الناس اللي بتيجي الجيش. فشوفت قد إيه أهل أسوان وأهل النوبة ناس طيبين. أنا لا أجامل والله، ناس طيبين قوي، وناس خيّرين قوي. يعني فـ.. كفاية استقبالكوا الجميل ليا، وأي حاجة هانقدر نعملها، إحنا عينينا الاتنين ليكم، وبالمناسبة، ده من خير بلدنا، ماحدش بيعمل حاجة من معاه، يا ريت كان معانا أكتر من.. معانا إحنا، وإحنا نعمل أكتر. أي حاجة تطلبوها نعملها بفضلك يا رب.


مواطنة1: إحنا أهل القرية كلنا بنرحب بحضرتك، وإحنا بنقولك أهلا وسهلا هنا في قريتك. ونفسنا وأملنا إن هنا معظم الشباب الصراحة يعني شغالين في السياحة، والسياحة طبعا دي فترة مؤقتة ،بس في الفترات التانية مابيلقوش غن هم رزق ليهم. فياريت إن هم يتيح ليهم هنا فرص في أسوان فرص عمل ليهم، وده أملنا يعني.

السيسي: أنا بشكرك على ده، وبقولك لا إنتي تطلبي. تطلبوا اللي إنتوا عايزينه وإحنا نعمله. وبالمناسبة إحنا قلنا إن كل القرى ديت يا دكتور مصطفى هاندخلها في المرحلة الأولى بتاعة حياة كريمة من كل الوجوه. وأنا مش، وده هايتعمل بفضل الله سبحانه وتعالى خلال الفترة اللي إحنا بنتكلم فيها ديت.

السياحة.. حاجة جميلة جدا لو عرفنا ننظمها، وده كان كلامنا مع المحافظ دلوقتي، لو قدرنا ننظمها بشكل كويس، ونطور فيها كويس.. أنا بقولك كدا ليه؟ السياحة عايزة حاجتين: عايزة استقرار، واستقبال. استقرار وإيه؟ واستقبال. وإنتوا ناس طيبين قوي، وبتستقبلوا الناس بشكل جميل.

الاستقرار يعني مافيش إرهاب، عشان بس إيه (يضحك الرئيس) لا ده بينا كلنا. ماهو.. إحنا وإحنا بنعمل والله، هو الي إحنا الكام سنة اللي فاتوا دول، إحنا ما كان كل جهدنا إن إحنا نعمل الاستقرار. إنتم كمان أدرى بالناس اللي موجودة، وإزاي تنصحوهم، وإزاي تحافظوا عليهم، الشباب وكدا، إن هو مايروحش بعيد.

لأن هو دايما نقول السياحة مرتبطة.. الناس اللي جاية عايزة تقضي وقت وافيش فيه خوف، ولا فزع من حاجة. لو إحنا عرفنا إن إحنا نوفر ده، ونستمر كدا، صدقوني، السياحة بتطور مش بس بجهد البلد، لأ، ده بجهد الاستمرار، استقبال الناس والشغل، كل ما هايبقى في شغل إنت هاتصرف أكتر، وهاتجد أكتر، وإحنا معاكوا، وإحنا معاكوا، هانعمل، ونعمل أكتر.

وأنا لسه كنت بقلو تاني، هو تنظيم ده.. أنا عايز أقول لأختي، بتتكلم عن التوظيف.. أنا ممكن أقولك حاضر.. لكن أنا ما أقولش حاجة إلا ما كنت إيه؟ نعملها.

أنا عايز أقولك على حاجة، أنا كنت في توشكى إمبارح مش كدا؟ وشرق العوينات مش بعيد عنها، والطريق واصل لأسوان أهو، يمكن كمان شهر ولا حاجة يا دكتور مصطفى، ويبقى النهارده الطريق من هنا لغاية توشكى تم رفع كفاءته وتطويره، مايبقاش عليه.. عرضه 24 متر.. مافيش عليه أي مشكلة.

طب في شغل هناك؟ أيوة. واجب علينا دلوقتي كشباب الصعيد، مش بس أهلنا هنا في النوبة. أنا بتكلم في كام ألف فدان؟ أنا بتكلم في نص مليون فدان، عايزة رجالة، الرجالة تقعد هنا؟ ولا تقعد هناك؟ طب هناك هاياخدوا إيه؟ هناك هايقعد يعيش وياكل ويشرب، وعالأقل هاياخد 3000 جنيه في الشهر. هاياخد كام؟

الشغل موجود على طول، الزراعة موجودة على طول. إحنا مش لاقيين حد يشتغل في توشكى وشرق العوينات. ولسه كنت بتكلم مع هنا إن إحنا محتاجين إن إنتم الجامعة والمدارس، تروح تشوف، لأ تشوف، تروحوا تشوفوا الحاجة اللي موجودة.

ففي شغل موجود هناك؟ آه، ووجب علينا كشباب بقى أنا بتكلم، إن هم مايفكروش دايما في إن هم يبقوا دايما جنب الإيه؟ جنب البيت. الدنيا كلها بتتحرك عشان تشتغل في كل حتة. الأرض موجودة، والزرع موجود، والميه موجودة بفضل الله سبحانه وتعالى وبفضل دعواتكوا، والشغل موجود.


مواطنة2: أنا بتمنى حاجة بسيطة بس، لأن بالتعليم والصحة الدنيا تعلى كلها.

السيسي: صحيح.

مواطنة2: صحيح، مش كدا ولا إيه حضرتك؟

السيسي: آه طبعا.

مواطنة2: طيب، أنا بتمنى بس إن بدل المواصلات هنا عندنا صعبة عشان يطلعوا لأسوان وكدا، عايزين بس مدارس فنية تجارية تجاري صناعي تمريض يبقى هنا لعيالنا هنا في قرية غرب سهيل، زي في غرب أسوان بردو نفس الموضوع في مدارس فني صناعي كله هناك، فبتمنى بس يكون في مدارس لعيالنا هنا جوة القرية.

السيسي: إنتي اسمك إيه الأول؟

مواطنة2: عبير محمد الدمرداش.

السيسي: يا أستاذة عبير. شوفي أنا هاقولك. إحنا في الحقيقة لما بنقول حياة كريمة، بنخش بنعمل كل المسائل، بما فيهم اللي حضرتك بتتكلمي عليه ده. يعني إيه؟ بما فيهم لو مافيش، مافيش.. يعني مركز طبي، نعمله. لو مافيش مركز محلي يا دكتور مصطفى، بنعمله. لو مافيش مدرسة بنعملها.

فكل الطلبات ديت إحنا، مش بقول إحنا.. هو البرنامج كدا. برنامج حياة كريمة إيه؟ هو كدا. بيتعمل، بيخش عالقرية، لو في.. بيعمل الصرف الصحي، بيعمل، بيحسن الميه، يحسن الكهربا.. لو الطرق، لو في بيوت عايزة تترفع كفائتها بتترفع كفائتها.. ثم بنكمل المنشآت اللي هي، اللي بتحتاجها، أو اللي المفروض تبقى موجودة في القرية، بنعملها ضمن ال..

فإنتي اتطمني إن إحنا في حياة كريمة، إحنا قلنا إن إحنا هاندخل دول يا دكتور مصطفى كلهم في حياة كريمة.

...

تم الحوار المفتوح في محافظة أسوان بقرية غرب سهيل، بحضور عدد من أهالي القرية.

...

خدمة الخطابات الكاملة للسيسي تجدونها في هذا الرابط