حصاد 2017 | أبرز كلمات الرئيس السيسي

على مدار العام، ألقى الرئيس المصري عبد الفتاح السيسي بعشرات الخطابات والكلمات والتعليقات، التي تعرضت إلى الكثير من الشؤون والمشكلات في مصر.

من منطلق وعينا بأهمية هذه الكلمات، رصدناها جميعًا واحتفظنا بها وسجلناها كتابة على موقعنا، وفي ختام 2017، نرصد لكم أبرز كلمات الرئيس المصري.


1

"ربنا بيحب الحُسن.. والسلام حُسن.. والخير حُسن.. والتعاطف حُسن.. وأي حاجة قبح، مالهاش مكان، أي قبيح مالهوش مكان. الجمال فقط هو اللي ليه مكان، واحنا هنا في بلدنا هنقدّم دا، هنقدّم الجمال والحُسن للعالم كله".

نص كلمة السيسى فى الكاتدرائية المرقسية بمناسبة عيد الميلاد 6/1/2017



2

"أنا مش نظام يا أستاذ عمرو، أنا إنسان انتوا اختارتوه وقلتوله تعالى عدي بينا المرحلة ديت، لكن أنا مش نظام جي يأسس لديمومة واستمرار".

نص المداخلة الهاتفية للسيسي مع عمرو أديب 9/1/2017



3

"يا ساتر على أهل الشر، وتخطيطها وترتيبها لإيذائنا كلنا، ويستخدمونا ناكل بعضنا البعض، ويقولّك خلّي بالك دا مش سائل فيك، خلّي بالك دول مش واخدين بالهم منكم، خلّي بالك دا ما بيأكلكش، خلّي بالك دا ما بيعلّمكش، بس ما قالكش خلي بالك إنك انت فقير قوي؟ ماحدش قالّك انك انت فقير قوي؟ لأ يا ريت حد يقولّكم إن احنا فقرا قوي! فقرا قوي".

نص مداخلة السيسي في اللقاء الدوري الثاني للشباب بأسوان "إحنا فقرا" 28/1/2017



4

"إذا كنتم شايفين إن أنا بحاول أكون إنسان كويس، فأنا في الآخر، ربتني أمي يعني".

نص كلمة السيسى فى عيد الأم 21/3/2017



5

"هو أنا بتخلّى عنك؟ أنا ماتخلتش ومش هتخلّى عنك، ولا هتخلى عنكم إلا إن انتم قلتولي امشي".

نص كلمة الرئيس السيسي في مؤتمر الشباب بالإسماعيلية، جلسة الأربعاء 26/4/2017



6

"إنت دارس الموضوع اللي بتتكلم فيه دا؟ انت دارسه؟ إيه دا؟ انتوا دارسين الكلام اللي بتقولوه دا؟"

نص تعليق السيسي في افتتاح مشروعات تنموية بدمياط.. وانفعاله على النائب أبو المعاطي مصطفى 23/5/2017



7

"الكلام دا ربنا بيحبه. الكلام اللي أنا بقول عليه دا، ربنا بيحبه، اللي هو الصح. الكلام المظبوط. مش أي حاجة تانية".

نص كلمة السيسي في حفل إفطار الأسرة المصرية 20/6/2017



8

"ده مصر فيها 100 مليون بيفطروا ويتغدوا ويتعشوا في يوم.. في يوم.. بأكل سنة من بعض الدول. أكل سنة".

نص كلمة السيسي في افتتاح قاعدة محمد نجيب العسكرية 22/7/2017



9

"عرّفوا الناس الحكاية أكتر، وأنا كنت يمكن اتكلمت في الجلسة ديَت وقلّت خلّوا بالكم، هو.. لازم يبقى عندنا فوبيا، فوبيا، من إسقاط الدولة. فاهمين كلامي؟"

نص كلمة السيسي في الجلسة الختامية بمؤتمر الشباب الرابع في الأسكندرية 25/7/2017



10

"إوعوا نكون بس هنُقصِر، وانا الكلام دا أنا اتكلمت فيه قبل كدا، إن إحنا نُقصِر حقوق الإنسان في الحقوق السياسية فقط، لكن عايز أقولك، ما بتسألنيش ليه عن حق الإنسان في مصر في التعليم الجيد؟ ما عندناش تعليم جيد، أنا بقولك. ما بتسألنيش ليه عن حق العلاج الجيد في مصر؟ ما عندناش علاج جيد في مصر. ما بتكلمنيش ليه عن حق التوظيف وحق التشغيل للمواطن في مصر؟ ما عندناش توظيف جيد في مصر".

نص تعليق السيسي في المؤتمر الفرنسي عن حقوق الإنسان في مصر 24/10/2017



11

"الإرهاب بينتهك إنسانيتنا، الإرهاب بيعتدي على إنسانيتنا، الإرهاب بيحطم إنسانيتنا. وعايز أقول إن مقاومة الإرهاب حق لإنسانيتنا. مقاومة الإرهاب والتصدي للإرهاب حق من حقوق الإنسان. حق جديد بضيفه أنا في مصر لحقوق الإنسان".

نص كلمة السيسي في افتتاح منتدى شباب العالم 5/11/2017



12

"إن فضلنا ساكتين، هنضيع. الفكرة كدا، المعضلة كدا. إن اتحركنا تزعلوا، ولما تزعلوا تتحركوا، فلما تتحركوا، تلخبطوا. فلما تلخبطوا، تهدوا البلد. وإن ما اتحركناش، هنفضل عاجزين. فإنتوا تحسوا بالعجز وتحسوا بالقِلة، فتتحركوا، فتهدوا البلد".

نص كلمة السيسي في اليوم الثالث لأعمال منتدى شباب العالم.. عن البطالة والنمو السكاني 7/11/2017



13

"أنا كنت في أسرتي، عايشين في بيت فيه كل أسرتي، بنات البيت كلهم، كان كل بنات البيت يقولوا: يا ريت بابانا عمو عبد الفتاح، يا ريت بابانا عمو عبد الفتاح".

نص كلمة السيسي في اليوم الرابع لمنتدى شباب العالم.. تمكين المرأة المصرية 8/11/2017



14

"أنا بكلمكم بجد. مفيش، قسمًا بالله ما في مخلوق يقدر ياخد جنيه... لا يا جماعة، مفيش كلام من دا! هنا مفيش كلام من دا في البلد! هنا الجنيه براجل! الجنيه براجل ما يضيعش كدا... مفيش حد بيمد إيده".

نص كلمة السيسي أثناء افتتاح مشروع الاستزراع السمكي في كفر الشيخ 18/11/2017


لقراءة كلمات السيسي مكتوبة على المنصة اقرأ: نصوص كلمات الرئيس عبد الفتاح السيسي